Geen zoekvraag opgegeven

Tekst
Onderstaande tekst is niet 100% betrouwbaar

dit is: Sonnius mach sie to Vtrecht noch beide in bewaer hebben. In desen schrifften wart die pausselicke affgodery gelastert, vnde Godes edele wairheit gepresen, die ons durch Lutherus vnd ander getrouwe mithelpers seer troistlick van Gott is geƶpenbaret. Oick wart dairin beklaicht die gefangene stanthafftige Kuerfurst Hertoch Hans van Saxen, die nu anno Liiij. in Februario mit syne loflicke housfrow Sibilla, geborne Hertoginne van Cleue, is gestoruen, vnd sijnt ongetwyuelt beide, mit Lutherus horen predicant, by Christus in ewiger freuden. Des gelijcks wart seer beklaicht die sware ghefenckenis des Christelicken fursten Philippi Lantgrauen to Hessen, den Gott noch lang by leuen in regyrung behalde. Hyr beneuen wart oick beklaicht, die affsettung des gotfruchtigen Hermanni, bisschops to Collen, geboren vyt den edelen Grauen van Weda, die den papisten in sijner regyrung een spiegel aller duechden is gewesen. Bouen alles wart beklaicht, dat die groitmechtige Keyser van den paus so ellendich wurt bedrogen. Dit sijnt die meeste oirsaken wairom die vorghemelde kettermeisters also op my verbittert sijnt gewesen.

Anno . L . den . iij . February sijn ick to Hatthem op den hous gebracht, vnd op enen hogen torn besloten, mit een beschreuen ordel van ewiger gefenckenis. Doch sachten my Sonnius vnde Gruwel, "dat sie my verlossen sollen, wol ick in de gefencknis so viel vur den paus dichten, als ick vorhin tegen hem gheschreuen hadde, vnde hebben my geoirlefft ene Bibel, etlicke alde doctoren, papyr vnde feder to gebruicken, Vnde Sonnius hefft my mennichmail ontboden (als viel treflicke luyd binnen Arnhem vnde Vtrecht wel weten) dat my gene verlossung wer to hopen, eer hem dat pauselicke boeck gepresentiert wurde.

Dwijl aber sulck heyllois schryuen nyt geschede, sijn ick omtrynt twe jair op gemelden Toren gebleuen, vnde sol (mijns achten) in onsalighe mistroisticheyt zijn gefallen, wer mijn sterfdach der tijt gekomen. Anno. Lj . in Decembri ward ick van den Toren ghelaten, mit sware verborgung, nyt van den hous to wijeken, vnde in desen stand hefft my Sonnius noch anderhalff jair gehalden, vnde mit grote schand voir den menschen beladen Anno. Liij. op Pynxterdach is my gheoirleft van Hatthem to scheiden, mer scherp beuolen, binnen. xiiij . neestfolgende dagen, in Loeuen to wesen, vnde dair. iij. jair in die pausselicke Theology to studyren.

Kost vnde kleyder sol ick mit Missen vnd koirsanck suecken, als ick vernam vyt opgebroken brieften, die my an den Louanischen. Theologen mit gegheuen waren, dair oick in stont, dat sie op mijn leuen mereken,

Sluiten