Onderstaande tekst is niet 100% betrouwbaar

180

Unsern grus etc. Uch ist, als wir nicht zwiueln wol wissentlich, wie der hochgeborne furste herre Friderich, vnser vater seliger, vnd wir dem heyligen cristenglouben zcu erhebunge vns langeczijt gegin eczlichen des landes zcu Behem haben must seczen vnd durch bystandt vnser muter, der heyligen Römischen kirchen, haben wir bey wilen getan obir vermogen, sind auch an vnsern ianden vnd, das vns clegelicher ist, an vnsern getruwen mannen vnd vndirsaszen dadurch groszlich beschedigt wurden, vnd hatten gehofft, es solde nu solich ordenunge im lande zcu Behmen wurden sin, dodurch got der almechtige globet, der cristen gloube vnd dy Romisch kirche erhaben wurden. Als ist uns warhaffticlich furkomen, das Girzick von Podiebrad sich regierunge des konigreichs zcu Beheim vndirsteht wider konigk Laszlan, vnsern swager, uwern rechten vnd naturlichen erbherren, sich ane alle beuelhunge vermeszlich gubernator nennet, dafur als wir hoffen ir yn nicht haldet ader vfgenomen habt vnd vermeynet dij fromen cristen, die es mit dem vorgenanten uwern erbherren vnd noch ordenunge der heyligen Römischen kirchen halden, zcu notigen vnd zcu bedrangen: Haben wir angesehen den almechtigen got, zcu dem wir in allen vnd doch sunderlich in den sachen vnzwiuelichen trost vnd hoffnunge haben, die heylige Römische kirche, konigk Laszlan, vnsern swager, uwern erbherren vnd vns •der fromen cristenlichen syten bestendig zcu getan vnd getruweten mit gots hulffe, dem vorgenanten Girzick vnd sinem mutwillen zcu widerstehen. Ist an vns komen die schrifft, der copien wir uch hirynn verslossen senden, die vns sere befremdet vnd obirmasze verwundert, das auch vnser liber bruder, der dann ein junger furst ist, zcu sulchem getzogen vnd angewieset wirdet, ist vns in swerem mute gantz pynlich. Ab wir nu durch dieselhen gehindert wurden, wie das quem, das wir doch nicht getruwen, das wir nicht also fry vnd volkomen, wir gerne teten, -zcu solchen sachen getun konden, begern wir von, uch mit gutlichem flisz bittende, ir woliet obgerurte sachen vnd sunderlich uwern erbherren ansehen, ym, vns vnd der cristlichen guten seyten im lande zcu Behem wider den Girzick byestehen, in mylder betrachtunge, wie sich uwer eldern vnd ir in dem cristen

Sluiten