STADS-KLOKKENIST IN BERGEN OP ZOOM

Anno XIIIICXCV die XXV mensis Novembris was J o o s Wals geboren van Mechelen aengenomen van der stadt wegen de stadt alhier zyne leefdage te diene en de selve Joos heeft alzoe aengenomen oick zijn leven lanck, ten waere of hy nrisdede oft nyet en condt gedoen, te houden ende onderhouden gaende slaende metten wyseren zoe dat behoirt metten voirsange opten grooten thorre van der prochiekercken alhier, dander opten thorre van der gasthuys capelle ende de derde op ten thorren van der hallen aen Symon Lems alhier, wel verstaende, waert dat de stadt het horalogie werck van der hallen voirs. afdede ende dat dese stellen opte havene, dat de voirs. Joos deselve horalogie van der hallen sal houden gaende als voren, waer vore deselve stadt den voirs. Joose oick zijn leefdage lanck gehouden zijn zal te gevene alle jaer zeven ponden ende thien scellingen groote brab. gelts ende noch thien scellingen brab. tot behouf van eenen tabbaerde, die hy jaerlicx tegens den prochessie dach gereet sal moeten hebben van der selver verwen, dat de andere der stadt gemeyne officieren hebben zullen, omme met henluden oic in der selver processie te gaene. Ende waert, dat men een vierde horalogie stelde, soe sal hem de stadt deralf oic loonen nae advenant. Des is voirwerde, dat hy altijt zijn sal een van de ijckmeesters. Ende waert datter eenich werck brake oft behoufde eenige nootlicke reparacie olt dat men hem eenen nyeuwe horalogie dede maken, soe sal men hem dairaff loonen ende geven zynen arbeyt.

R.A. 's Hert., B. o. Z., R. 306 f. 135 vo.

W G. J.