Onderstaande tekst is niet 100% betrouwbaar

ende onsen landen dat tot groten staden ende nut komen is, dair voir Deric vurscreven ende sijne erven in dat vurscreven scholtampt soilen sitten ongekroidt, als dat wij ende onse erven sij nimmermeer en soilen doin noch laten ontsetten van den vurscreven scholteit ampt in geenrewijs, wij en hebben hem ten irsten die vurscreven summe gelts mit allen alsulken scade ende cost als sij omme onsen will ende des ampts wille vurscreven geleden ende gedain hedden guetlich ende wale betailt tot besceidelike rekeninge ende bewisinge ons of onsen erven dair af te doin, so dats Deric vurscreven ende sinen erven genuege, sonder argelist. Alle dese vurscreven punten ende vurwerden gelaven wij etc. In orkonde der wairheit etc. Gegeven int jair onss Heren MCCCLXXXVIII des Manendages na sente Jacobs dach des heiligen apostels.

7 September 1388.

Fol. 1 i6v. Wij Willem van Gulich etc. doin kont etc. ende bekennen dat wij gegeven hebben ende geven mit desen brieve, Otten van den Gruithuys, omme menicherhande dienste wille die he ons gedain heft ende noch doin sal, onse hofstede gelegen an den Nyen marckt tusschen onse gewanthuyse, up die een side ende tusschen onser stat gewanthuys van Arnhem up die ander sijde, also als die gelegen is streckende van den Nyenmarckt an die strate toe die geet tot sente Johans poirte wert, uit wilken hofstede Otte van den Gruithuys vurscreven of sine erven ons ende nacomelingen drie grote jairlix als te tijnse up alle sente Lamberts dage geven ende betalen soilen erflich ende ewelich. In orkonde des so hebben wij onsen segel an desen brief doin hangen. Gegeven in den jair onss Heren MCCCLXXXVIII up onser Vrouwen avont als men scrijft Nativitas.

Sluiten